Header Ads

Ads Bar

අලි පන්නන්න ගිය වන ජීවි නිලධාරියා අලියකු පහරදී මරුට

මාතලේ-රජ්ජම්මන වනජීවී කලාපය තුළ අලි පළවා හැරීමේ මෙහෙයුමක යෙදී සිටි වනජීවී අඩවි සහකාර නිලධාරියෙකු  වන අලියෙකු පහරදීමෙන් අද(15) එම ස්ථානයේදීම මිය  ගිය බව මහවෙල පොලීසිය කියයි.

මියගොස් ඇත්තේ රත්තොට, කුඹල්ඔලුව පදිංචි 42 හැවිරිදි මෛත්‍රී මධුශාන් වික්‍රමසිංහ නම්වූ එක්දරු පියෙකි. මොහු රජ්ජම්මන වනජීවී කාර්යාලයට අනුයුක්තව සේවය කළ නිලධාරියෙකි.

නාඋල-ලිහිනියපිටිය ප්‍රදේශයේ ජන ජීවිතයට බාධා කරමින් සැරිසරන වන අලි කණ්ඩායමක් පලවා හැරීම සඳහා මෙම මෙහෙයුම 14 දින ආරම්භ කර තිබිණි. මාතලේ-උතුරු මාතලේ ප්‍රදේශයේ වන අලි සිටින ඉසව්වක් සෝදිසි කරන අතරතුරදී එම නිලධාරියා පිටුපස වන අලියා පන්නාගෙනවිත් පහරදී ඇත.

මියගිය අයගේ මළ සිරුර ආසන්නයේ වන අලි රංචුවක් ගැවසීම හේතුවෙන් මහත් පරිශ්‍රමයක් දරා සිරුර ඉවතට ගත් බව පොලිසිය කියයි.

එම වන ජීවී නිලධාරියා මීට වසර හතරකට පමණ පෙරද වන අලියෙකුගේ පහරකෑමට ලක්ව දිවි  ගලවා ගත් අයෙකි.

මියගිය අයගේ මළසිරුර මාතලේ රෝහල මෘත ශරීරාගාරයේ තැන්පත් කර ඇත.

මහවෙල පොලීසිය වැඩිදුර පරීක්ෂණ පවත්වයි.
(ඡායාරූපය - මහේෂ් කීර්තිරත්න)
(ඡායාරූප - ඉන්දික අරුණ කුමාර)



No comments

Powered by Blogger.